5月21﹣24日 李家曼谷“泰Hea"之旅（Part 2)

快樂既時間過得真係好快呀！ 眨眼之間又到第三日啦， 李家泰“Hea"之旅都過左差不多一半啦， 已經開始有點唔捨得! 再黎Part 2繼續回顧！





May 23 (Day 3)

今朝兩家人都提早少少起身， 因為大家都想好好咁Hea個早上， 因為下午就要轉酒店到Siam Kempinski, 所以都想可以好好咁享受下Okura既factilities ^^! 今早我地唔食酒店既早餐buffet, 改到酒店既日本餐廳Yamazato山里


呢個就係個早餐set！味道， 賣相及質素一流！ 正宗日式味道， 好味道！ 以為餐仔細細唔會太飽， 點知食哂全個餐都唔少野， 又飯又湯！ 不過個人仍然prefer早餐buffet多少少， 因為真係好relax又多選擇，最重要係d野食真係好味！ 與朋友聚會， hea食早餐真係不錯！ 如果可以stay兩晚以上， 當然recommend試哂兩間餐廳既早餐啦！ 如果一晚， 早餐buffet必試！

早餐之後，兩個大男人就再到泳池“浮水” Men's chat 一下，好好Relax一下， 而太太們就選擇了返房休息一下及執拾行李  12pm啦！ 我地就check out離開The Okura Prestige啦！ 個人感覺好滿意呢間酒店， 呢個價錢有Ritz Carlton質素！ 新， 清潔， 舒服及方便係我既comments!  我估下次我都會再入住呢間酒店！ 見唔見到酒店中間有個好似露台既野突左出黎？！ 果個就係泳池啦！正！

由Okura搭的士到我最期待既Siam Kempinski(因為最多朋友推介）都只係十分鐘左右， 勁快！  入到大堂 ～ 好Grand喎！ Lobby都有3﹣4層樓高，感覺好豪華！同okura相比很不同！

安排好check in之後會有人帶路上房及介紹酒店服務！ 佢地件uniform係酒店特色之一！好有型 

入到房啦！ 呢個就係好多人推介既Kempinski! Siam市區內個City Resort! 感覺真係好自成一角！ 寧靜 and 舒適度 

房間好靚呀！ 感覺都好好  所有野應有盡有！ 留房hea都應該唔悶！ Mini bar大部份既野都係free of charge，正！

個人最愛係佢個浴缸！ 剛剛check in 入房， 當然都會Compare 兩間酒店， 個人覺得自己比較prefer The Okura Prestige! 房間Okura真係較新較大， 感覺Kempinski開始有點舊，房內wifI又較okura慢多了，而價錢又較Okura貴, 個人及團友都覺得Okura better! 但整體不錯！

由於book左個spa個5pm, 所以check in 之後可以去食個quick lunch! (緊記要提早book spa及reconfirm時間， 因之前好趕咁book都只係有兩個位俾我兩公婆，本以為要同張家分開一陣， 但好在子沒有放棄，出發前再call多一次問會唔會有多兩位，最終好彩都可以下午一齊去, 緊記下次到泰Hea Spa, 一定要早一兩星期前做booking, 始終online booking有discount, 而且可做定research決定要做既款式會比較好， spa既要求人人不同)！ 我地o係Paragon食左個旅遊書推介既玻璃牛肉粉， 可以一試， 不過麵既質地真係好特別.....感覺其怪但幾好食！ 去到Siam大商場， 就真係變返香港價錢！由於有時間， 大家都o係附近既商場逛逛！ 大部分都係名牌子！ 去到泰國仲行？ 睇其他野啦！

哈哈！ 兩公婆多獎個eason  What awards are they?!

行到4：15pm，太太們NaRaYa之後我地就趕到Thong Lo既Divana Divine Spa  今次又遇上塞車， 最終遲到， 要5:15pm至到步， 好彩有電話咭   可以打去先話會遲少少， 等佢地唔好release個appointment..... 泰國塞車太常見啦！（本以往data sim如果Hotel, restaurant and cafe有可以唔買都得， 呢d時候真係用得著！）到步啦， 因黎一杯welcome drink and 選香薰massage oil!

房間黎計， 咁多日以來呢間最有Thai Massage feel又有小橋流水聲   今日只安排了2hrs既香薰massage!

好舒服咁又過兩小時， 之後又有小點食！  在最肚餓既時候， 有此美食真係好滿足！ 睇下時間原來都差唔多8pm啦！

之後spa安排左“tuk tuk"車我地出Bts車站， 因為大部分靚既spa其實都唔係車站傍邊，不過一般都係5﹣10mins車程！ 到步之後太肚餓啦！就再次掃街醫住肚先啦， 就求其食個豬雜麵，不過本來都唔係好想食， 因為附近見到Mickey行過， very scary! 不過大家都肚餓但又想食少少野先， 食啦！其實都幾好食ga! 子就怕怕唔敢食， 只係食左少少張生之前買個Mango糯米飯頂一頂肚！

跟住呢程的士就係我地咁多程當中最火爆既一程！ 由於今晚已經遲啦， 我地再要趕到曼谷最大既河邊夜市Saphan Taksin區既Asiatique The Riverfront夜遊及dinner! 停左幾部taxi都唔去， 之後有部taxi啦， 先有天下大雨， 之後個司機勁“dou"路再加勁塞車！dou左少少唔緊要， 但越去越遠， 俾本旅遊書佢又唔睇， 唔理我地！ 好在有張DATA SIM即時睇GPS Map, 大約知o係邊， 同佢講英文又扮唔識， 既然係感我開始同佢講廣東話， 話之你啦！手指direction再加Gps佢都知冇得扮野啦！Dou唔緊再， 都冇理由dou到過橋啦！ 即係香港有遊客話去Stanley, 你唔會同我由港島過紅隧呀？好不容易就到步啦， 都成10：15PM了， 大家又未食dinner, 想shopping但又怕早關門， 點好呢？唔理啦， 旅行最緊要happy! 不過想起車中聽泰文歌， 真係好好笑！ ～ 男人聲唱 “你咪溝仔， 你咪溝仔， 溝仔你就會陽X”...... 笑到我地呀！

我地呢幾日都好好！ 去到邊都剛好停雨， 所以都幾開心！幸福摩天輪？！

呢個河邊市場由好多個倉組成， 又有唔同既貨品主題， 不過都係醫肚先啦！ 老婆未食野！ 最終食呢間泰國菜！

香港價錢， 環境舒服！ 食物都唔錯 

食飽飽之後， 行左一陣又買左D紀念品就搭Taxi返酒店啦！ 今次遇上勁cool但好司機！ 75銖 20mins返到酒店！ 本想到pub飲杯野， 不過almost last order又坐得唔耐， 就o係酒店四圍行下， 影下相！ 兩公婆浪漫遊有浪漫好， 有朋友相伴又有另一種快樂！ 希望大家都Enjoy呢個trip啦！ 旅行最快樂既， 就係可以放下一切， relax一番！

May 24 (Day 4)

最後一天既旅程啦！ 一早起身除了coffee之外， 就係有香檳贈慶！ 咁先係good morning 個早餐其實都不錯！ 不過仍然miss Okura既早餐呢！

食飽之後當然要參觀Kempinski既園林美景啦！ 感覺咁先似去左渡假

好relax!  呢個感覺真係好好...........可惜今日趕住走， 如果唔係長hea都唔錯！

由於張生間房12pm要check out, 而我地extend左一間房到2pm至check out! 方便pack之後既戰利品入行李呢！  我地之後去左行Paragon下面既Gourmet market而冇去行Big C啦！ 旅行變左行super market! 哈哈！

買完野之後返房hea左陣之後就check out啦！ 存左行李o係酒店， 之後就到左Paragon搵食， 及到水族館“門口”影相留念！ 哈哈， 人蟹大戰！

最緊要子玩得開心！

臨走之前去左Manna食lunch! 之後就搭Taxi出去機場！ 哈哈～大部份泰國既的士司機都係一樣， 一遇到塞車， 明明傾好左價錢又o係度多多野講， 不過都冇理佢啦， 講好左由酒店到機場（全包）450銖！ 終於到機場啦，又開始唔捨得！

Check in之後就去左食個donut tea, 又行左一陣街！ 之後Final Ca
ll就入閘了！ Time to back Hong Kong啦！

今次第一次同阿chin & Sin Yan一齊去旅行， 都好開心呀！ 希望快d有機會下次一齊再衝出香港啦！

回港了！ 李家曼谷泰Hea4日3夜之旅正式完結啦！ 之後由張家車我地返屋企， 之前仲去左太子食宵夜呢  開心！

長假期差不多完結了！ 今個trip雖然係hea trip， 又做左好多個spa relax ! 不過泰國真係好熱呀， 有時候行得都有d辛苦， 不過相信下次再到曼谷， 如果可以再好好咁plan好行程， 相信會更輕鬆呢！之前好少去bangkok, 不過相信兩公婆好快就可以再encore呢！ 好好享受埋呢幾日假期啦！

Happy Trip!